“Laboratori i debatit mbi integrimin europian në auditorët universitarë-Nga fjala tek veprimi”

Konteksti – Edicioni II

Integrimi europian është prioriteti më strategjik i shtetit Shqiptar dhe rrjedhimisht prek thuajse të gjitha fushat, përfshirë këtu edhe atë të arsimit dhe të të rinjve. Me hapjen e negociatave në pranverën e 2020, Shqipërisë i dalin përpara edhe më shumë sfida. Ndër të tjera, përballimi me sukses i tyre varet edhe nga përgatitja e të rinjve si qytetarë aktiv, të angazhuar, me mendim kritik, aftësi analizuese, tolerantë dhe etikë në komunikim.  Është e rëndësishme edhe përforcimi i një debati publik të shëndetshëm e me bazë të gjerë lidhur me procesin, përfitimet, kostot dhe në tërësi ndikimin që do të ketë integrimi për Shqipërinë si edhe mbi tematika të tjera me interes për zhvillimin social-ekonomik të vendit dhe modelin e zhvillimit në të ardhmen në kushtet edhe të post-krizës COVID19.

Prej tetor 2019 e deri në qershor 2020, me mbështetjen e Fondacionit Shoqëria e Hapur për Shqipërinë, Qendra ‘Shkencë dhe Inovacion për Zhvillim’ (SCiDEV) zbatoi me sukses projektin ‘Laboratori i debatit mbi integrimin europian në auditorët universitarë’ në Tiranë dhe Durrës. Përmes këtij projekti u bë e mundur përforcimi i njohurive dhe zhvillimi i analizën kritike të komunitetit të studentëve e kërkuesve të rinj lidhur me Integrimin Europian dhe ndikimin shumëdimensional të tij në Shqipëri përmes organizimit të kampionatit të debatit në auditorët universitarë, fushatave të komunikimit dhe ndërgjegjësimit online, shkrimit të artikujve nga studentë dhe pedagogë në rubrikën Blog, organizimi i takimeve virtuale dhe konferencave me aktorë të tjerë. 108 studentë u angazhuan së bashku me 13 mentorë në 13 universitete publike dhe private.

Gjatë fazës së aplikimeve ka pasur interes dhe numër të konsiderueshëm aplikantësh, jo vetëm nga universitetet e përfshira në këtë fazë të projektit, por dhe nga qytete të tjera universitare të Shqipërisë. Këto zhvillime dëshmojnë interesin e studentëve për temën, angazhimet ekstrakurrikulare dhe nevojën për debat të strukturuar dhe mirë-informuar. Gjatë fazës së zbatimit, gjithashtu pati interes dhe vlerësim për rolin e projektit dhe rëndësinë e vazhdimësisë së tij në të ardhmen.

Pandemia COVID19 paraqiti sfida të mëdha për projektin, por SCiDEV u përqendrua menjëherë në përshtatjen e projektit sipas situatës së re të krijuar (Video finale me dëshmi nga pjesëmarrësit).

Bazuar në këtë përvojë dhe në interesin e ngjallur nga universitetet, pedagogët dhe studentët, SCiDEV propozon një edicion të dytë të kampionatit. Duke pasur parasysh kontekstin e ri ku veprojmë me hapjen e negociatave, me krizën shumë dimensionale social-ekonomike të shkaktuar nga COVID19 si edhe me nevojën për një rini të angazhuar dhe të motivuar, SCIDEV propozon që edicioni i dytë i debatit universitar për integrimin të përshtatet duke përqafuar jo vetëm debatin, por edhe veprimin dhe mbështetjen e të rinjve për aktivizimin e tyre konkret dhe specifik në fushën e arsimit në përditshmërinë e tyre në universitet dhe më gjerë në jetën publike por edhe sidomos aktivizim online.